"Unë Ricikloj" – Mënyra për të jetuar gjelbër!
Fryma e aktivizmit dhe angazhimit qytetar po forcohet gjithnjë e më shumë në vitet e fundit. "Unë Ricikloj" quhet nisma më e re që synon të motivojë komunitetin dhe individët për një mjedis sa më të qëndrueshëm me më pak mbeturina. Kjo nisëm ofron një program të mirëfilltë të riciklimit dhe shërbimit ekologjik për ndarjen dhe grumbullimin e mbeturinave në zyra, biznese, qëndra tregtare dhe më gjerë. "Ne besojmë se riciklimi është jetësor për mjedisin tonë, është e mirë për komunitetin, për bashkinë, për bizneset dhe organizatat" shkruhet në faqen e tyre zyrtare në Facebook.
Drejtuesi i kësaj nisme Ened Mato u shpreh për Historia Ime se "ndryshe nga shumë fushata ndërgjegjësuese apo takime strategjike për riciklimin, nisma jonë vjen si nevojë e zgjerimit të shërbimeve dhe punëve ekologjike. Nuk është tërësisht e re për vendin tonë, i kemi parë të gjithë të rinj, burra, gra por fatkeqësisht dhe fëmijë të vegjël duke mbledhur kanaçe nëpër kazanet e plehrave. Një formë riciklimi dhe sigurimi jetese është dhe kjo, por e rrezikshme dhe shfytëzuese për fëmijët". "Ndonëse jetojmë në një vend që nuk të jep shumë krah për nisma të këtilla, duhet që vetë ne qytetarët, të apasionuarit dhe aktivistë të mjedisit të ndërrmarim aksione të cilat do i shërbejnë mjedisit dhe një jetese më të shëndetshme.
Proçesi i riciklimit nuk është aq teorik sesa praktik. Problemet e para që kemi hasur në fillimin e kësaj nisme kanë qenë tërësisht teknike, si prsh: sa kosha të vendosim, sa të mëdhenj, si duhet të jenë , për ambiente të brendshme apo të jashtme, pasi të njëjtat problem mund do të kenë dhe ‘klientët’ tanë. Dikush ka një zyrë të vogël, dikush nuk ka vend në banakun e lokalit, dikush do ta vendosi jashtë, e me rradhë. Tashmë shumë nga këto kleçka janë zgjidhur dhe jemi në rrugën e duhur për të filluar këtë rrugëtim të gjatë mjedisor. Janë të shumta arsyet pse duhet të marrim këtë rrugë të vështirë, por kryesorja është të krijojmë përgjegjësinë qytetare për të trashëguar një mjedis sa më të shëndetshëm te fëmijët tanë" ka përfunduar ai.
Mënyra më e thjeshtë për të jetuar gjelbër
"Unë ricikloj" ofron falas shërbimin e mbledhjes dhe riciklimit të mbeturinave në zyra, institucione, organizata, përfaqësi ndërkombtare, hotele, restorante, shkolla, qendra tregtare si dhe çdo subjekt tjetër që do të reduktojë ndjeshëm mbeturinat dhe të përfshihet në mbrojtjen e mjedisit. Ne punojmë në fushën e mjedisit dhe punës me komunitetet që në 2002 dhe jemi fokusuar te riciklimi si një nga mënyrat më efikase dhe të rëndësishme për mbrojtjen e tij. Shërbimi jonë konsiston në sigurimin e koshave dhe mbledhjen e mbeturinave të ndara në mënyrë që ju të mund të ricikloni dhe përfitoni produkte të ricikluara.
Si të reduktojmë ndjeshëm mbeturinat ?
Një program i mirëfilltë riciklimi mund të reduktojë 30-50% të plehrave, por edhe më shumë në varësi të programit. Kjo mënyrë e reduktimit të mbeturinave është e vetmja mënyrë për të kursyer burimet natyrore dhe për të mos i hedhur ato në tokë, gropa, landfille apo të tjera. Depozitimi I tyre në mjedise, "landfille" apo thjesht gropa pa asnjë përpunim, krijon male me plehra që rriten dita ditës ,ndërkohë që sipërfaqja e tokës nuk rritet përkundrazi. "Unë ricikloj" është një shërbim jetësor për një mjedis më të pastër, për ekonominë dhe për punësimin e komuniteteve në nevojë.
Si të fitojmë para duke ricikluar?
Nëse dëshironi të jetoni gjelbër dhe të fitoni disa lek nëpërmjet riciklimit kjo tashmë është e mundur. Nuk është se do të bëheni të pasur por është një mënyrë për të justifikuar mundin tuaj në ndarjen e mbeturinave. Është një mënyrë mjaft efikase që mbeturinat tuaja të reduktohen dhe të jenë larg landfilleve dhe ju të shpërbleheni për këtë inisiativë. Sot është e mundur të përfitosh nga riciklimi. Ju mund të përfshiheni në programin tonë të riciklimit " Unë Ricikloj", duke përftuar mbrapsht produkte të ricikluara, duke u bërë pjesë e lëvizjes së gjelbër, duke ndihmuar në hapjen e vëndeve të punës dhe shërbimeve ekologjike.
